У раёне прайшоў адзіны дзень інфармавання.
Сярод тэм, якія выносіліся на разгляд, – «Культурная і прыродная спадчына Беларусі як фактар развіцця турызму», «Забеспячэнне бяспекі дзяцей у летні аздараўленчы перыяд», «Адказнасць за рэгістрацыю на інтэрнэт-рэсурсах, прызнаных экстрэмісцкімі, распаўсюджванне экстрэмісцкіх матэрыялаў у глабальнай сетцы Інтэрнэт. Адказнасць за махлярства і вымаганне грошай», «Сусветны дзень без тытуню».
Інфармацыйна-прапагандысцкія групы працавалі ў Поразаўскай СШ, Свіслацкім ПМС, Грынкаўскім ДС БШ.
Абазначаныя тэмы абмеркаваны з калектывам УАЗ «Свіслацкая ЦРБ». Тут працавала інфармацыйна-прапагандысцкая група на чале са старшынёй райвыканкама Аляксандрам Вярсоцкім. Данесці аўдыторыі інфармацыю дня таксама прыйшлі начальнік Гродзенскага абласнога ўпраўлення Міністэрства па надзвычайных сітуацыях Рэспублікі Беларусь палкознік унутранай службы Дзмітрый Лакіза, начальнік РАУС падпалкоўнік міліцыі Аляксандр Якімчык, начальнік райаддзела МНС падпалкоўнік унутранай службы Павел Нядзвецкі, начальнік аддзела ідэалагічнай работы, культуры і па справах моладзі райвыканкама Ірына Паўлючэня, в. а. галоўнага ўрача ДУ «Свіслацкі райЦГЭ» Ірына Гаркавенка.
– Гісторыка-культурная спадчына як элемент развіцця турызму на тэрыторыі Рэспублікі Беларусь – тэма вельмі блізкая для мяне, – падкрэсліў Аляксандр Вярсоцкі. – Блізкая па некалькіх складніках. Перш за ўсё тым, што жыццём было так наканавана, што мне прышлося ўнесці пэўную лепту ў аднаўленне аб’ектаў, якія прадстаўляюць гісторыка-культурную каштоўнасць. Гэта аб’екты, якія ўваходзілі ў праграму «Замкі Беларусі». Першапачаткова выдзеленыя сродкі патраціў на замак Гальшанскі ў Ашмянскім раёне і замак Крэўскі ў Смаргонскім раёне. Сёння яны часткова адноўлены, там створаны экспазіцыі, якія адкрытыя для наведвання турыстаў. Яшчэ адзін аб’ект майго гонару – сядзіба М. К. Агінскага ў Смаргонскім раёне. Гэта аб’ект гісторыка-культурнай спадчыны 1 катэгорыі. Аднаўленне яго праходзіла ў рамках праграмы транспамежнага супрацоўніцтва. Вельмі прыемна, што сёння гэтыя аб’екты наведваюць турысты. Што датычыцца нашага раёна, спрыяю, каб аднавіць сядзібу Багудзенкі. Яна ўнікальная, такіх аб’ектаў зусім невялікая колькасць – 2–3 у Беларусі. Хоцацца, каб гэтая сядзіба не прыходзіла ў запусценне, а служыла для нашага раёна і нашай дзяржавы.
Старшыня райвыканкама таксама адзначыў, што мэтавы паказчык экспарту турыстычных паслуг у раёне вырас са 100 долараў да 4 тысяч долараў.
На экстрэмісцкай дзейнасці і адказнасці за яе спыніўся ў сваім выступленні Аляксандр Якімчык.
– Жнівеньскія падзеі 2020 года паказалі, што па сутнасці сітуацыя ў краіне разгойдваецца праз тэлеграм-каналы. На гэтую сітуацыю дзяржава адэкватна адрэагавала. У сувязі з чым былі ўнесены змяненні ў Адміністрацыйны і Крымінальны кодэкс, – падкрэсліў Аляксандр Аляксандравіч. – Грамадзянам, якія з банальнай цікавасці чытаюць забароненыя каналы, прызнаныя экстрэмісцкім матэрыялам, адказнасць не пагражае. Аднак розная прапаганда – рэпосты, каментарыі, аказанне падтрымкі ў папулярызацыі канала, фінансаванне – цягне адміністрацыйную адказнасць. Падпіска – элемент папулярызацыі, распаўсюджвання экстрэмісцкай інфармацыі. Таму падпісчыкі таксама нясуць адміністратыўную адказнасць.
За распаўсюджванне, выраб, захоўванне інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць, таксама прадугледжана адказнасць.
Выступаючы таксама спыніўся на фактах кіберзлачыннасці, заклікаўшы ўсіх быць асцярожнымі і не паддавацца на ўгаворы перадачы грошай для ўрэгулявання нібыта складанай сітуацыі.
Важную тэму – забеспячэнне бяспекі дзяцей у летні перыяд – пазначылі прадстаўнікі МНС.
Павел Нядзвецкі давёў інфармацыю па траўміраванні і гібелі малых. Ад знешніх прычын штогод гінуць больш за 100 дзяцей. Атручэнні, дарожна-транспартныя здарэнні, праглынанне іншародных прадметаў – гэта далёка не поўны пералік сітуацый, якія прыводзяць да трагедыі. У летні перыяд да гэтага спісу дадаецца яшчэ і выпадзенне дзяцей з вокнаў.
Дзмітрый Лакіза парэкамендаваў не пакідаць малых без нагляду, кантраляваць іх і выключыць сітуацыі, якія могуць садзейнічаць трагедыі. Так, у Навагрудскім раёне летась гадавалы малы ўпаў у вядро з вадой і патануў. Небяспечныя і хатнія басейны. У цяперашні час праходзіць акцыя «Не пакідайце дзяцей адных!». Яна, як напамін дарослым кантраляваць сваіх дзяцей, асабліва ў канікулярны перыяд, і вучыць іх бяспецы.
Марына ЯНЮК
Фота аўтара
