Адпачыць на свежым паветры, паспрабаваць прыгатаванай на кастры ежы, а таксама ацаніць хараство і разнастайнасць прыроды роднай старонкі – усё гэта магчыма ў турыстычна-краязнаўчым лагеры «Вандроўнік».
Штогод Свіслацкі цэнтр турызму і краязнаўства арганізоўвае палатачны лагер «Вандроўнік». Першая лагерная змена размясцілася на стадыёне Дварчанскага дзіцячага сада-базавай школы. На базе гэтай установы адукацыі для выхаванцаў арганізавана харчаванне.
Дзевяць дзён трынаццаці школьнікам ва ўзросце 11–15 гадоў запомняцца разнастайнымі мерапрыемствамі. Большасць з дзяцей – навучэнцы аб’яднанняў па інтарэсах Свіслацкага цэнтра турызму і краязнаўства, актыўныя ўдзельнікі турысцка-спартыўных і краязнаўчых мерапрыемстваў.
Арганізацыя дзейнасці лагера накіравана на фарміраванне ў выхаванцаў устойлівай цікавасці да гісторыі роднага краю. Аб гэтым і клапоцяцца дырэктар лагера Алег Саган, выхавальнікі Ігар Баяркін і Надзея Шыраева. Вясёламу і карыснаму правядзенню часу спрыяюць інтэлектуальныя гульні, экскурсіі, розныя конкурсы і віктарыны, спаборніцтвы і шмат іншых мерапрыемстваў. Кожны дзень у лагеры праходзяць вучэбна-трэніровачныя заняткі па спартыўнаму арыентаванню і спартыўнаму турызму. Знаходзіцца час і для культурна-масавых мерапрыемстваў, гутарак каля вогнішча.
Хлопчыкі і дзяўчынкі, а таксама выхавальнікі забяспечаны веласіпедамі, таму пад час экскурсій маюць магчымасць убачыць багаты каларыт населеных пунктаў раёна, пазнаёміцца з іх жыхарамі і цікавымі мясцінамі, ў турыстычным і краязнаўчым плане.
Кожны вечар у лагеры агульны збор, дзе каля кастра ўсе разам аналізуюць, як прайшоў дзень, абменьваюцца сваімі ўражаннямі, запаўняюць «Экран настрою». У канцы змены вызначыцца, якія дні ў лагеры сталі самымі выніковымі.
Падарожжа па маляўнічых мясцінах, удзел у забаўляльных, турысцка-спартыўных мерапрыемствах, песні пад гітару – усё гэта гарантуе выхаванцам здаровы адпачынак і яркія ўражанні.
Ліза СВІСТУН, 15 гадоў:
– Я першы раз у палатачным лагеры. Тут здорава! Для нас арганізоўваюць шмат цікавых мерапрыемстваў. Больш за ўсё я люблю велападарожжы.
Захар ПАЧЭБУТ, 11 гадоў:
– Мне больш за ўсё падабаецца ездзіць на велаэкскурсіі па Свіслаччыне і даведвацца пра наш край. У вольны час мы гуляем у футбол, валейбол. Цікава працаваць з компасам.
Архіп ШТОП, 13 гадоў:
– Цікава жыць у палатках. Я люблю альпінізм, арыентаванне. Зараз мы рыхтуемся да спаборніцтваў. Будзем выступаць у гарадскім парку ў дзень вызвалення Свіслачы ад нямецка-фашысцкіх захопнікаў.
Юлія ШТОП, маці Архіпа:
– У лагеры створаны добрыя ўмовы для аздараўлення дзяцей. Архіп займаецца ў аб’яднанні па інтарэсах ад Цэнтра турызму і краязнаўства і з нецярпеннем чакаў змену. Дзякуй дырэктару і выхавальнікам лагера за тое, што дзецям цікава там. Я радая, што Архіпу падабаецца такі адпачынак.
Хрысціна СПАРНЮК, маці Арцёма:
– Арцём сам захацеў пайсці ў турыстычна-краязнаўчы лагер. Мы падтрымалі яго выбар. Кожны дзень мы размаўляем з ім па тэлефоне. Адпачынак на свежым паветры разам з сябрамі – гэта здорава. Дзеці з карысцю праводзяць час.
Святлана МАКСІМЮК
Фота аўтара
