banner

Іх звязаў фальклор, альбо Незабыўныя сустрэчы суседзяў

23 Декабря’14
1570
Іх звязаў фальклор,  альбо Незабыўныя  сустрэчы суседзяўГасціннасць беларускага народа славілася ва ўсе гады нягледзячы на тое, што мяняецца час, прыярытэты, а з імі і людзі. Асаблівы акцэнт на гэтай якасці беларусаў быў зроблены ў бягучым годзе. Шэраг мерапрыемстваў, якія падкрэслілі гасціннасць свіслацкага краю, прайшлі ў нашым раёне. Багата іх было арганізавана цэнтральнай раённай бібліятэкай. Самыя значныя – сустрэчы з сучаснымі пісьменнікамі, абласны семінар бібліятэкараў. На  мерапрыемства "Фальклор – душа калектыву”, якое стала своеасаблівым вынікам Года гасціннасці ў бібліятэцы, з канцэртнай праграмай завіталі госці з Малабераставіцкага Дома культуры. З задавальненнем наведалі свята і акунуліся ў багатую вусную творчасць нашых продкаў прадстаўнікі некалькіх пакаленняў: вучні старэйшых класаў гімназіі № 1 імя К. Каліноўскага, маладыя людзі з абмежаванымі магчымасцямі аддзялення дзённага прабывання для інвалідаў і члены аб’яднання "Свіслачанка”, што дзейнічае пры бібліятэцы. 
Пачалася сустрэча частаваннем гасцей караваем. Кожны з прысутных адведаў кавалачак смачнага пірага, спечанага работнікамі бібліятэкі. Перш чым даць слова фальклорнаму калектыву "Вясёлка” Малабераставіцкага Дома культуры, загадчыца аддзела абслугоўвання і інфармацыі цэнтральнай раённай бібліятэкі Алена Рабчанка і бібліятэкар Святлана Калачык расказалі аб тым, якую ролю для нашых продкаў выконваў ручнік. Правялі віктарыну па вуснай народнай творчасці, прапанаваўшы самыя цікавыя загадкі, прыказкі, прымаўкі і скорагаворкі. Гаварылі яны і пра тое, як важна ведаць фальклорныя творы, у якіх адлюстравана гісторыя беларускага народа. Вусная народная творчасць у свой час адыграла вялікую ролю ў нацыянальнай самасвядомасці беларусаў, паўплывала на развіццё літаратуры і мастацтва, а сёння мае вялікае значэнне ў фарміраванні духоўнага выхавання падрастаючага пакалення. 
Эстафету ад гаспадароў перанялі госці з суседняга раёна. Удзельнікам мерапрыемства было не да смутку: яны хутка падхоплівалі знаёмыя мелодыі ў выкананні фальклорнага калектыву "Вясёлка”, які дарыў народныя песні "Ой гаралі хлопцы ніву”, "Гыля, гыля, шэры гусі”, "Былі ў мяне сваты”, "А ў полі вярба нахілёная”, "А як дзед з бабай пайшоў па каліну” і іншыя. Гучнымі апладысментамі аўдыторыя падтрымала гумарэску, прывезеную суседзямі. 
Дырэктар цэнтралізаванай бібліятэчнай сістэмы Н. У. Калач падзякавала фальклорнаму калектыву за прыемна праведзеныя хвіліны, пажадала поспехаў на яго творчым шляху і прапанавала не губляць сяброўскія сувязі і ў будучым.  

Алена КЕДЗІК
(тэкст і фота).

Предыдущая статья

«Прямая линия» председателя райисполкома