banner

Трымай парадкі ля сваёй хаткі

11 Мая’09
1851

Трымай парадкі ля сваёй хаткіТак ужо заведзена — з надыходам вясны прыбірацца на сваіх падворках, бяліць вапнай дрэўцы, абнаўляць агароджу, падфарбоўваць вокны і дзверы дамоў. І як радуецца вока, калі навокал чысціня і парадак! Як сваю тэрыторыю даглядаюць жыхары Нязбодзіцкага сельскага Савета, мы пацікавіліся ў яго старшыні Марыі Фёдараўны Качко.


— На 1 студзеня бягучага года ў прыватным сектары сельсавета налічваецца 834 дамы, з іх 565 жылых і 269 пустуючых. Фактычна за ўсімі пустуючымі домаўладаннямі замацаваны наследнікі, 72 — маюць праваўстаноўчыя дакументы. З уступленнем у сілу Указа Прэзідэнта Рэспублікі Беларусь № 70 ад 3 лютага 2006 года «Аб мерах па ўпарадкаванню ўліку і скарачэнню колькасці пустуючых дамоў з гаспадарчымі пабудовамі ў сельскай мясцовасці» сельвыканкамам праведзена вялікая работа. У выніку па ўсіх пустуючых дамах устаноўлены наследнікі. Рашэннем раённага выканаўчага камітэта ў рэгістр пустуючых унесена 21 домаўладанне.

Сельсавет, як і яго жыхары, зацікаўлены ў змяншэнні колькасці пустуючых дамоў. Пад іх катэгорыю адносяцца аварыйныя і трухлявыя. Толькі за апошнія два гады разабрана 11 аварыйных дамоў, 15 прададзена пад перавоз, у выніку заключэння дагавораў куплі-продажу паміж грамадзянамі 4 пустуючыя домаўладанні сталі жылымі.

Трымай парадкі ля сваёй хаткі— Як здзяйсняецца добраўпарадкаванне тэрыторый пустуючых домаўладанняў?

— Калі па праўдзе, то гэта пытанне застаецца праблемным. На тэрыторыі сельсавета налічваецца больш 30 фундаментаў пустуючых дамоў. Уборку такіх падворкаў мы здзяйсняем рэгулярна. У мінулым годзе нам пашанцавала з рабочымі, якія былі накіраваны цэнтрам занятасці. Амаль усе работы па добраўпарадкаванню арганізоўвалі з імі. Наконт зносу фундаментаў пытанне застаецца адкрытым. На гэта патрабуюцца вялікія грашовыя сродкі і спецыяльная тэхніка, якая пакуль ёсць толькі ў ДП «Свіслацкае ПМС».

Большасць пустуючых домаўладанняў даглядаюць самі наследнікі. Дарэчы, некаторых можна ставіць у прыклад недобрасумленным мясцовым жыхарам. А падчас такія тэрыторыі прыводзяць у парадак неабыякавыя суседзі.

— Напэўна, з добраўпарадкаваннем тэрыторый каля жылых дамоў з такімі праблемамі не даводзіцца сутыкацца?

— Штогадова ў пачатку вясны мы праводзім месячнік па добраўпарадкаванню. Гэты перыяд якраз прыпадае на перадвелікодныя святы. Вяскоўцы самі выходзяць на ўборку сваіх падворкаў, прыводзяць у парадак дамы, агароджу. Транспарт па вывазу смецця прадастаўляюць сельскагаспадарчы філіял «Нязбодзічы» ААТ «Ваўкавыскі мясакамбінат» і ААТ «Грынкі». Акрамя гэтага, кожнаму жыхару сельсавета вядома размяшчэнне звалак. Па ініцыятыве сельсавета ў 2007 годзе былі разасланы памяткі аб іх месцазнаходжанні.

Сельвыканкам правёў немалую работу па забеспячэнню насельніцтва штыкетнікам і паясамі, былі заключаны дагаворы з ДПУ НП «Белавежская пушча» аб пастаўцы прадукцыі па нізкай цане. За чатыры гады сяльчанам рэалізавана 307 метраў кубічных штыкетніку і 54 — паясоў.

Трымай парадкі ля сваёй хаткі— У раёне, у тым ліку ў Нязбодзіцкім сельсавеце, з'яўляецца ўсё больш дамоў узорнага парадку. Як вы лічыце, чаму?

— Актывізавана работа па арганізацыі спаборніцтваў «Дом высокай санітарнай культуры». Пачынаючы з 2004 года, мы ў кожным населеным пункце правялі святы вёсак, на якіх былі падведзены вынікі конкурсу. На сённяшні дзень з такім статусам налічваецца 25 домаўладанняў. Па выніках раённага конкурсу па добраўпарадкаванню жыхарка в. Грынкі Л. П. Турак заняла прызавое месца, за што была ўдастоена каштоўнага падарунка.

Трымай парадкі ля сваёй хаткі— Хто займаецца добраўпарадкаваннем тэрыторый, якія прылягаюць да аб'ектаў сельскай гаспадаркі і сацыяльна-культурнага прызначэння?

— Сельгаспрадпрыемствы гэта пытанне заўсёды трымаюць на кантролі. Тэрыторыі мехмайстэрняў, зернесховішчаў, фермаў прыбіраюцца рэгулярна на працягу года. Што датычыцца ФАПаў, сельскіх бібліятэк, Дамоў культуры, то тут заўсёды падтрымліваецца парадак. Ганарымся чысцінёй і акультурваннем тэрыторый адукацыйных устаноў. Горш справы ішлі з аб'ектамі гандлёвых кропак, цяпер гэта работа і тут вядзецца належным чынам.

— На тэрыторыі сельсавета ёсць помнікі, пахаванні загінуўшых воінаў? Як яны даглядаюцца?

— Ёсць помнік у Стоках, Нязбодзічах і Грынках, памятны камень — у Гаркаўшчыне, пахаванне — на ятвескіх могілках. Штогод ля іх наводзіцца парадак, помнікі падфарбоўваюцца, азеляняюцца тэрыторыі вакол іх.

— Як плануеце арганізаваць работу па добраўпарадкаванню ў бягучым годзе?

— Я думаю, што яшчэ з большай адказнасцю. На тэрыторыі сельсавета знаходзіцца два аграгарадкі, патрэбна падтрымліваць іх статус.

Гутарыла Алена КЕДЗІК.

Фота Грыгорыя ШЫРАЕВА.

Предыдущая статья

Все решаемо