І адкрыты для кожнага дзверы ў гэты добры ўстойлівы дом...

Такія словы са школьнага гімна сустракаюць кожнага, хто пераступае парог Сакольніцкай базавай школы. Першага верасня тут, як і ў іншых навучальных установах раёна, адбылася ўрачыстая лінейка, прысвечаная Дню ведаў. Ганаровымі гасцямі былі старшыня Свіслацкага райвыканкама У. С. Анішчык, начальнік аддзела адукацыі, спорту і турызму Б. Б. Кісялеўскі, начальнік аддзялення крымінальнага вышуку РАУС В. М. Кавальчук.
– Шчыра віншую ўсіх са святам, – пачала ўрачыстую лінейку дырэктар школы А. У. Крэчак. Дарэчы гэта яе першы школьны званок у новай пасадзе. – Няхай гэты навучальны год будзе добрым для ўсіх. Жадаю вам энергіі і натхнення. Спадзяюся, што мы і далей будзем весці разам наш карабель ведаў.
У. С. Анішчык таксама далучыўся да віншаванняў і адзначыў, што ў 1973 годзе ён прыйшоў у першы клас такой жа вясковай школы. Старшыня райвыканкама ўпэўнены, што веды, набытыя ў гэтай навучальнай установе, вучні пранясуць праз усё жыццё.
– За пяцьдзясят тры гады існавання ваша школа мае сваю гісторыю. Зараз да вас прыйшлі яшчэ два вучні, значыць, ёсць будучыня. Жадаю ўсім здароўя, прыгожых усмешак, настаўнікам – каб да кожнага дзіцяці падыходзілі са шчодрай душой, бацькам – каб былі для сваіх сыноў і дачок прыкладам ва ўсім і сустракалі іх са школы ветліва і цёпла.
Два гады некалі адпрацаваў у Сакольніцкай школе настаўнікам Б. Б. Кісялеўскі. Добрыя ўспаміны засталіся ў яго аб тым часе. Браніслаў Браніслававіч пажадаў вучням як мага даўжэй сберагчы жаданне вучыцца, бацькам – каб дзеці прыносілі ім толькі добрыя адзнакі, а настаўнікам, вядома, – цікавага навучальнага года і новых вучняў.
Не абышлося без узнагарод. За добрасумленную працу ганаровымі граматамі аддзела адукацыі, спорту і турызму Свіслацкага райвыканкама адзначаны настаўніца пачатковых класаў Н. Б. Якута і бібліятэкар Т. І. Ношчык.
Ад імя бацькоў з пажаданнямі здароўя, мудрасці, цярпення і міру выступіла С. І. Саўко.
Першы званок, дадзены вучаніцай другога класа А. Місюляй і дзевяцікласнікам В. Райкоўскім, запрасіў усіх на першы тэматычны ўрок "Дзякуй салдатам Перамогі за тое, што не ведалі вайны”. Пасля ўрока дзевяцікласнікі ўсклалі кветкі да помніка загінуўшым у гады вайны землякам.