У дзень дзяржаўных сімвалаў нашай краіны – Герба і Флага – свіслачане сабраліся на галоўнай плошчы горада, каб ушанаваць беларускую сімволіку. Яна яднае нас як грамадзян Беларусі, дэманструе наша адзінства і агульную волю.Менавіта гэтая думка была падкрэслена ў выступленнні старшыні раённага выканаўчага камітэта А. М. Таргонскага, які выступіў з прамовай на ўрачыстым мітынгу, прысвечаным Дню Дзяржаўнага герба і Дзяржаўнага флага Рэспублікі Беларусь.
Кіраўнік раёна нагадаў, што дзяржаўная сімволіка – гэта неад’емны атрыбут дзяржаўнага суверэнітэту, а адносіны да яе сведчаць аб узроўні кожнага грамадзяніна, самасвядомасці народа. Яна з’яўляецца крытэрыем пераемнасці пакаленняў і духоўнага здароўя нацыі.
Алег Мечыслававіч пажадаў свіслачанам з нагоды дзяржаўнага свята міру, шчасця, згоды і натхнёнай працы на карысць роднай Беларусі.
Аб тым, як нашы землякі на міжнародным узроўні праслаўляюць Беларусь, нагадаў старшыня раённай арганізацыі РГА "Белая Русь” М. М. Грунтовіч. Ён успомніў трыўмфальнае выступленне нашай зямлячкі Яніны Карольчык на Алімпіядзе ў Сіднэі. У 2000 годзе Дзяржаўны флаг Беларусі ўзвіўся над стадыёнам сталіцы Аўстраліі, а Дзяржаўны гімн знаменаваў перамогу спартсменкі з Беларусі.Тая павага, якая надаецца дзяржаўнай сімволіцы ў Беларусі, толькі сведчыць аб сталасці нашага грамадства і росце аўтарытэту нашай краіны ў свеце.
Самым урачыстым стаў момант пад’ему Дзяржаўнага флага Рэспублікі Беларусь пад гукі Дзяржаўнага гімна.
Ганаровага права ўзняць Флаг былі ўдастоены ветеран Вялікай Айчыннай вайны П. І. Жук, старшыня ААТ "Акр-Агра”, якое прызнана пераможцам спаборніцтва па выніках мінулага года сярод сельскагаспадарчых арганізацый, А. А. Лісоўскі і пераможца рэспубліканскай прадметнай алімпіяды па матэматыцы У. Місюля.
Чырвона-зялёна-белы трыкалор павольна ўздымаецца ў вышыню і праз некаторы час ўжо горда рэе на фоне блакітных нябёсаў. Як пяецца ў нашым Гімне: "Горда ж узвіся ў ясныя высі, сцяг пераможны – радасці сцяг!”. Святочны ўзнёслы настрой мітынгу надала музычная праграма, падрыхтаваная работнікамі культуры і юнымі грамадзянамі нашай краіны. Таленавітае выкананне песень вака-лістамі стала годным аздабленнем мерапрыемства, на якім былі ўшанаваны дзяржаўныя сімвалы Беларусі.
Ядвіга КУРЫЛА.
Фота Грыгорыя ШЫРАЕВА.
Фота Грыгорыя ШЫРАЕВА.
