banner

На парозе Пасха з пірагамі

27 Марта’13
1769
На парозе Пасха з пірагамі У нядзелю беларусы-каталікі адзначылі Вербніцу, пасвенцілі ў храме галінкі вярбы, якія сімвалізуюць уваход Хрыста ў Іерусалім. Толькі некалькі дзён нас аддзяляюць ад Вялікадня. У чаканні яго і свіслачанка Вера Сцяпанаўна Лобач. Яна, як і большасць гаспадынь, наводзіць парадкі ў кватэры і дбае аб прыгатаванні святочнага стала, каб годна сустрэць свята, дагадзіць сваім родным – мужу Станіславу і сынам  Дзмітрыю і Андрэю.
Асноўныя і самыя важныя справы Вера Сцяпанаўна адкладвае на чацвер. Перад Вялікаднем яго называюць чыстым. Так даўней рабіла яе маці Эмілія Адамаўна. Менавіта яна навучыла дачку ахайнасці, перадала пасхальныя традыцыі і рэцэпты. Да сённяшніх дзён Вера Сцяпанаўна памятае, як маці старанна рыхтавалася да Вялікадня: накрухмальвала занавескі, засцілала новыя абрусы і дываны, выпякала духмяныя пірагі.
Мінула дзевятнаццаць гадоў, як не стала дарагога чалавека. І ўсе гэтыя гады Вера Сцяпанаўна хіліцца да свякроўкі Ганны Міхайлаўны. Вось і сёлета з’ездзіла ў вёску і дапамагла прыбрацца ў хаце. У пятніцу зноў яны сустрэнуцца, каб прыняцца за гатаванне смачных пірагоў, рэцэптамі якіх падзялілася з намі сённяшняя гераіня "Карыснай серады”.

Велікодны пірог. Для цеста спатрэбіцца 2 літры малака, 150 грамаў маргарыну ці масла, 100 г дражджэй, 100 г разынак, 6 яек, літровы слоік цукру з верхам і 4 кг мукі.
Яйкі і палову цукру ўзбіць міксерам, распусціць маргарын, давесці да кіпення малако, развесці дрожджы з цукрам і цёплым малаком. Наліваем у міску цёплае (негарачае) малако, дадаем маргарын, узбітыя яйкі з цукрам, затым разведзеныя дрожджы, разынкі, другую палову цукру, перамешваем, паступова дадаючы прасеяную праз сіта муку. Добра і доўга вымешваем, каб цеста не бралася за рукі. На некалькі гадзін цеста ставім у цёплае месца. Каб пірог быў прыгожы, выкладваем цеста ў формы адным кавалкам, не дадаючы і не адымаючы яго. Даем цесту падысці, затым адпраўляем формы ў печ альбо духоўку, выпякаем да гатоўнасці. Гарачыя пірагі зверху змазваем бялком з цукрам.    
Дарэчы, Вера Сцяпанаўна са свякроўкай  замешваюць пірагі ў пятніцу познім вечарам, ставяць цеста на цёплую печ і толькі раніцай выкладваюць яго ў змазаныя тлушчам формы і выпякаюць у печы прыкладна  70 хвілін. За тэмпературай у печы сочыць свякроўка. Пірагоў з порцыі атрымліваецца шмат, таму тым, у каго сям’я невялікая, дастаткова абмежавацца паловай порцыі.
Белы кісель (аўсяны). Такую страву Вера Сцяпанаўна рыхтуе для родных звычайна ў шчыры пост. Для яго прыгатавання спатрэбіцца пачак аўсяных камякоў, 1,5 л цёплай вады, верхняя скарынка ад чорнага хлеба. Высыпаем у пасудзіну камякі, крышым на маленькія кавалачкі скарынку, заліваем усё цёплай вадой, вымешваем, ставім на ноч у цёплае месца для закваскі. Пасля ўсё добра аджымаем праз друшляк. У атрыманую вадкасць дадаем соль, воцат (прыкладна лыжку). Варыць, пастаянна памешваючы, на слабым агні да загусцення. Разліць у талеркі. Калі застыне, ужываць з цукрам альбо салодкай вадой. Не ў пост кісель можна заскварыць маленькімі кавалачкамі сала.  
Хрусты. Інгрэдыенты: 2 яйкі і 1 жаўток, 1,5 сталовай лыжкі цукру, 1 лыжка алею, 1 чайная лыжка сметанковага масла, ¼ чайнай лыжкі солі, 1 сталовая лыжка воцату, 2 шклянкі мукі.
Замешваем крутое цеста, выкладваем на дошку, добра вымінаем і прысыпаем мукой. Потым накрываем ручніком альбо цёплай каструляй на 30 хвілін. Дзелім цеста на чатыры часткі, кожную тонка-тонка раскачваем, робім хрусты. Пасля таго, як пастынуць, перасыпаем цукровай пудрай. Хрусты атрымліваюцца лёгкія і пышныя.   
Салат "Вітамінны”. Возьмем невялікі качан капусты, бурачок, морквіну, цыбуліну і яблык. Капусту шынкуем, а ўсе астатнія сырыя інгрэдыенты (акрамя цыбулі) націраем на тарцы "па-карэйскі”, цыбулю нарэзваем на дробныя кубікі. Перамешваем, дадаем соль, цукар, воцат і алей на смак.  
Салат "Мухамор”. Складнікі: кукуруза, абсмажаныя паасобку цыбуля, морква, батон, вараная каўбаса, нарэзаная кубікамі, яйкі і памідоры.
Усе інгрэдыенты выкладваюцца слаямі, змазваюцца маянэзам. Верхні слой добра прамазваецца маянэзам і пасыпаецца дробна парэзанымі памідорамі.
Салат з сэрца. Адваранае сэрца (можна замяніць мясам), агурок салёны, абабраны ад лупіны, яблык – усё нарэзваецца саломкай, дадаюцца цыбуля і яйкі кубікамі. Салат запраўляецца маянэзам.
Вараная скумбрыя. Марынад: 0,5 л вады, па 1 чайнай лыжцы солі, цукру і воцату (пасля таго, як марынад закіпіць), перац, каляндра, гваздзіка. Рыбу рэжам на кавалкі, апускаем у марынад і варым да гатоўнасці. Страва падобная да кансерваў.
Велікодныя яйкі. Пры фарбаванні яек Вера Сцяпанаўна часцей прытрымліваецца даўнейшых рэцэптаў. На яйкі накладае гумкі з-пад шын, апускае ў лупінне ад цыбулі. Дарэчы, насычаную фарбу дае лупінне сіняй цыбулі.
Яна выкарыстоўвае такі спосаб: размалёўвае сырыя яйкі воскам, а потым апускае іх у фарбу.
Можна абкручваць яйкі лісточкамі розных раслін (выкарыстоўваюцца лісточкі пакаёвых кветак).
Елена КЕДИК.
Фото автора.

Предыдущая статья

Вернулись с дипломами