У мінулую нядзелю ў Свіслачы адбылося свята Масленіцы. З гуляннем, спаборніцтвамі, атракцыёнамі і, вядома ж, з блінамі. Іх было столькі, што проста вочы разбягаліся. З мёдам, варэннем, маслам, ікрою, рыбай, мясам, капустай… Пах ад бліноў лунаў над плошчаю такі, што дух займала.
Распачалося свята песнямі народнага калектыву "Крынічанька”. Артысты спявалі развітальную песню зіме і запрашалі ў госці вясну. І вось яны, дзве прыгажуні, сустрэліся, каб сказаць адна адной "Да пабачэння!”. Перадала Зіма Вясне скарбонку з «залатым» зернем, пажадала сястрыцы шчаслівых радасных дзён і, махнуўшы на развітанне рукою, знікла з вачэй.
І вось ужо гарыць агнём пудзіла. Канец зіме, вясна на парозе!
Ізноў гучаць вясёлыя песні, гаспадыня свята запрашае свіслачан і гасцей горада паўдзельнічаць у розных конкурсах, гульнях, атракцыёнах.
У выніку першае месца за кулінарнае майстэрства атрымала школа мастацтваў, другое – УЗ "Свіслацкая ЦРБ”, а трэцяе падзялілі паміж сабою СШ № 3 і дашкольны цэнтр развіцця дзіцяці г. Свіслач.
Шмат жадаючых было ўзабрацца на высокі слуп з прызамі. Самымі дасціпнымі аказаліся хлопцы-падлеткі В. Райкоўскі і Н. Гуштын. Ім і дасталіся прызы.
Цікавыя гульні ладзілі грынкаўскія артысты тэатра гульні "Карагод”. Усюды гучалі жарты, вясёлы смех, і разам з усімі смяялася ў небе сонейка, такое па-веснавому цёплае і ласкавае.
Так святкавалася Масленіца ў Свіслачы, свята заканчэння зімы і прыходу вясны.
Застаецца толькі шчыра падзякаваць работнікам раённага Дома культуры, якія падрыхтавалі святочную праграму і падарылі столькі радасных і незабыўных хвілін.
Ядвіга КОБРЫНЕЦ.
Фота Грыгорыя ШЫРАЕВА.
