banner

Свіслаччына адзначыла Дзень вызвалення

19 Июля’13
2127
Свіслаччына  адзначыла  Дзень вызвалення17 ліпеня. Менавіта ў гэты дзень свіслачане з года ў год збіраюцца на гарадской плошчы, каб  узгадаць імёны тых, хто загінуў, вызваляючы нашу малую радзіму ад нямецка-фашысцкіх захопнікаў. Гэта дата, калі да брацкай магілы загінуўшым воінам нясуць жывыя кветкі і вянкі, ушаноўваюць светлую памяць не вярнуўшыхся з поля бою мінутай маўчання. Словы падзякі за жыццё пад мірным небам у гэты дзень гучаць у адрас ветэранаў і ўдзельнікаў Вялікай Айчыннай вайны, жыхароў, якія адраджалі Свіслаччыну ў пасляваенныя гады, маладога пакалення, якое зараз прадаўжае і ўшаноўвае добрыя традыцыі землякоў.  
З усіх куточкаў Свіслачы на ўпрыгожаную сцягамі плошчу накіроўваліся ганаровыя госці, прадстаўнікі працоўных калектываў, грамадскіх аб’яднанняў, моладзь і дзетвара. Урачыста, пад Гімн Рэспублікі Беларусь, адкрыўся мітынг "Мы ніколі не забудзем вас, героі!”  
– Падчас наступлення ІІ Беларускага фронту 48 армія нанесла вырашальны ўдар па гітлераўскім войскам у раёне Поразава, – нагадаў у сваім выступленні намеснік старшыні райвыканкама В. А. Суботка. – 15 ліпеня 1944 года войскі Чырвонай Арміі ступілі на свіслацкую зямлю. У выніку трохдзённых цяжкіх баёў 17 ліпеня была вызвалена Свіслач і ўся тэрыторыя раёна. Дарагою цаною дасталася свабода і жыхарам Свіслаччыны. Пры вызваленні раёна загінула каля паўтары тысячы байцоў Чырвонай Арміі і народных мсціўцаў. Сярод іх камандзір 217-й стралковай дывізіі, Герой Савецкага Саюза палкоўнік М. П. Масонаў, камандзір 668-га стралковага палка гэтай жа дывізіі падпалкоўнік У. А. Свістанюк, маёр Пячоркін… Нялёгка прыйшлося і тым, хто з попелу і руін аднаўляў разбураныя адміністрацыйныя будынкі, бальніцы, школы, дамы.  
– Мы ніколі не забудзем тых, хто гераічна змагаўся за вызваленне нашага раёна, нашай радзімы, – адзначыў ветэран Вялікай Айчыннай вайны П. І. Жук. – Няхай памяць аб іх адклікнецца ў сэрцах кожнага з нас светлым пачуццём, абярнецца добрай справай на карысць нашай Беларусі і яе народа.
Свіслаччына  адзначыла  Дзень вызваленняУжо каторы год Дзень вызвалення Свіслаччыны разам з жыхарамі раёна святкуюць ганаровыя госці – дачка і ўнук Героя Савецкага Саюза Мікалая Масонава І. М. Кальянава і А. Ф. Паліцын. Сёлета ва ўрачысты для свіслачан дзень яны таксама былі побач: ушанавалі памяць аб загінуўшых мінутай маўчання, усклалі кветкі да магілы бацькі і дзядулі, пабывалі на месцы яго гібелі.  
Ад маладога пакалення выступіла выпускніца СШ № 3 г. Свіслач, пераможца раённага конкурсу "Вучань года-2013” Вераніка Валанцей.
Жывыя кветкі і вянкі, з якімі прыйшлі на ўрачыстасць удзельнікі мітынгу як даніна памяці і павагі ляглі да падножжа брацкай магілы загінуўшым воінам-вызваліцелям. Да мемарыяльнага комплексу "Асілак” таксама ўскладзены вянкі і кветкі.
17 ліпеня для свіслачан – гэта не толькі дзень памяці і смутку, але свята гонару за свой любімы і дарагі сэрцу край. Таму ўвечары гарадская плошча асабліва ажывілася. Тут лілася музыка, гучалі цудоўныя песні, ладзіліся танцы. На дзіцячых атракцыёнах весяліліся маленькія грамадзяне нашага краю. Гандлёвыя кропкі прапаноўвалі  ўдзельнікам свята бяспройгрышныя латарэі, салодкія пачастункі, цацкі і забавы.
Алена КЕДЗІК.

Предыдущая статья

Ольга Саевец – активистка, красавица и молодец