За парушэнні заканадаўства аб цэнаўтварэнні прымаюцца самыя строгія меры. Аб гэтым журналістам расказаў намеснік старшыні Камітэта дзяржаўнага кантролю Андрэй Лабовіч, перадае карэспандэнт БЕЛТА.
"Пытанні цэнаўтварэння з'яўляюцца адным з прыярытэтаў дзейнасці Камітэта дзяржкантролю. Мы не аднойчы папярэджвалі суб'екты гаспадарання аб няўхільным выкананні заканадаўства аб цэнах. Тым не менш кантрольныя мерапрыемствы, праведзеныя ў гэтым годзе ў адносінах амаль да 600 суб'ектаў гаспадарання, паказалі, што практычна ў палавіне з іх выяўлены парушэнні парадку і ўмоў гандлю. Каля 100 суб'ектаў гаспадарання парушалі заканадаўства аб цэнаўтварэнні. Прычым цэны завышаліся ў два разы і больш. Па ўсіх выяўленых фактах завышэння цэн прыняты меры. Цэны былі зменшаны, а вінаватыя прыцягнуты да адказнасці", - заявіў Андрэй Лабовіч.
У выпадку выяўлення недапушчальных фактаў парушэння заканадаўства аб цэнах былі прыняты самыя строгія меры, аж да прыпынення дзейнасці суб'ектаў гаспадарання. "За апошнія два тыдні ў Рэспубліцы Беларусь па патрабаванні Камітэта дзяржкантролю была прыпынена дзейнасць 14 суб'ектаў гаспадарання", - сказаў Андрэй Лабовіч.
Ён падкрэсліў, што камітэт таксама ажыццяўляе кантроль за выкананнем заканадаўства на рынку лекавых прэпаратаў і медыцынскіх паслуг. "Тут таксама не ўсё так, як хацелася б. Многія аптэчныя сеткі скарысталіся аслабленнем курса рубля і хутка перагледзелі цэны ў бок павышэння. А з улікам умацавання курса яны не спяшаюцца вяртаць іх на ранейшы ўзровень", - паведаміў намеснік старшыні Камітэта дзяржкантролю.
Выяўлены факты завышэння кошту медыцынскіх дыягнастычных паслуг. "У першую чаргу гэта датычыцца прыватных цэнтраў. Шляхам дубліравання асобных пазіцый завышаўся кошт паслуг. Па патрабаванні камітэта ў буйных дыягнастычных цэнтрах кошт камп'ютарнай тамаграфіі зменшаны ў сярэднім на 15 працэнтаў. Гэта работа будзе прадоўжана ў іншых медыцынскіх цэнтрах па ўсёй краіне", - заявіў Андрэй Лабовіч.
Не меншая ўвага ўдзяляецца парадку выкарыстання стабілізацыйных фондаў прадукцыі. "Камітэтам унесены прапановы па замацаванні на заканадаўчым узроўні методыкі разліку аб'ёмаў, неабходных для закладкі ў стабілізацыйныя фонды, а таксама ўвядзенне адказнасці за парушэнне парадку фарміравання і выкарыстання гэтых фондаў. Гэта дасць магчымасць больш эфектыўна іх выкарыстоўваць, палепшыўшы якасць і захаванасць прадукцыі", - лічыць намеснік старшыні КДК.
Камітэтам вядзецца актыўная работа па спыненні ценявых схем на спажывецкім рынку.
