Пры Гродзенскім абласным Савеце дэпутатаў будзе дзейнічаць Маладзёжны парламент, асноўнымі задачамі якога з’яўляюцца далучэнне маладых грамадзян да парламенцкай дзейнасці, фарміраванне ў іх прававой і палітычнай культуры, удзел у падрыхтоўцы нарматыўных прававых актаў органаў мясцовага самакіравання па пытаннях адукацыі, культуры, маладзёжнай палітыкі. Членам Маладзёжнага парламента могуць быць вучні 8–11 класаў, лідары дзіцячых і маладзёжных грамадскіх аб’яднанняў Гродзенскага рэгіёну. Колькасць членаў парламента налічвае 67 чалавек, з іх 7 дарослых – члены кансультацыйнага савета.
Першы этап выбараў у Маладзёжны парламент завяршыўся ў красавіку, калі кожная адукацыйная ўстанова вылучыла свайго кандыдата. У раёне іх налічвалася 11. Гэта Алег Янушкевіч з Дабравольскага ДС СШ, Ірына Краснадэмская з Сакольніцкай БШ, Ігар Кавальчук з Поразаўскай СШ, Ірына Ганчарук з СШ № 3, Кацярына Касінская з Навадворскай СШ, Аляксандра Пастырчук з Ханявіцкай СШ, Вольга Анісеня з Корнадзьскага ДС СШ, Марына Клімчук з СШ № 2, Аксана Славецкая з гімназіі № 1, Юрый Боўфал з Вердаміцкага ДС СШ і Наталля Варабей з Грынкаўскага ДС СШ.
26 мая ў раёне адбыўся адзіны дзень галасавання, у выніку якога пераможцай акружных выбараў і членам Парламента стала вучаніца 10 класа другой гарадской школы Марына Клімчук.
Марына актыўна ўдзельнічае ў грамадскім жыцці школы, горада і раёна. Неаднаразова з’яўлялася прызёрам абласных, рэспубліканскіх конкурсаў ігры на фартэпіяна. Удзельнічала ў прадметных алімпіядах на розных узроўнях. Была зоркай у галіне аратарскага і сцэнічнага майстэрства ў абласных і рэспубліканскіх конкурсах. Займаецца валанцёрскай дзейнасцю. У 2011 годзе стала членам ГА БРСМ.
Алена КЕДЗІК.
Фота Грыгорыя ШЫРАЕВА.
