Не адкрыю сакрэт, калі скажу, што сучаснае грамадства знаходзіцца пад уплывам многіх спакус. Гэта азартныя гульні, цыгарэты, алкаголь, наркотыкі і шмат іншага, чаго так хочацца паспрабаваць, асабліва ў падлеткавым узросце. Але, на жаль, для некаторых людзей гэтыя спробы заканчваюцца сапраўднай катастрофай, якую па-іншаму можна назваць залежнасцю. Толькі ў невялічкім Свіслацкім раёне ва ўрача-нарколага назіраюцца каля 850 чалавек, у тым ліку 130 жанчын фертыльнага ўзросту.
Праблема алкага-лізацыі насельніцтва непасрэдна ўплывае на дэмаграфічную сітуацыю ў раёне. Яна хвалюе спецыялістаў установы па ахове здароўя, прадстаўнікоў улады, праваахоўных органаў, адукацыі, іншых служб і, вядома, грамадства. Як паказвае практыка, кантраляваць і вырашаць гэтыя пытанні паасобку вельмі і вельмі складана. Таму на Свіслаччыне быў арганізаваны семінар “Метады практычнага рашэння праблемы алкагалізму і наркаманіі”, які аб’яднаў шырокае кола зацікаўленых асоб. сярод іх ідэалагічныя работнікі, свяшчэннаслужыцелі, урачы, медыятары, валанцёры з груп узаемадапамогі “Ананімныя наркаманы” і “Ананімныя алкаголікі”.
Вітаючы ўдзельнікаў семінара, намеснік старшыні райвыканкама Юрый Кулікоў адзначыў, што калі пасля сходу хоць адзін чалавек задумаецца над сваімі паводзінамі, зменіць свой светапогляд і лад жыцця, значыць, мы нездарма сабраліся ў гэтай зале.
Чаму чалавек становіцца залежным і як яму дапамагчы – над гэтымі адвечнымі пытаннямі разважаў кіраўнік сацыяльнага аддзела Гродзенскай епархіі іерэй Павел Каспяровіч. Сярод фактараў, якія ўплываюць на развіццё залежнасці ў чалавека, ён адзначыў генетычную схільнасць, сям’ю, малое асяроддзе (блізкія, сябры), грамадства, унутранае развіццё асобы.
– Свіслаччына вымушана вырашаць праблему залежнасці і ствараць сістэму падтрымкі, – сказаў іерэй Павел. – Спадзяюся, што тыя веды, якія вы сёння атрымаеце, будуць карыснымі.
Аб практычнай дапамозе залежным людзям расказала загадчыца наркалагічнага аддзялення лячэння і рэабілітацыі залежных асоб Гродзенскага абласнога клінічнага цэнтра “Псіхіятрыя-наркалогія” Валянціна Мурына. Самым дзейсным і эфектыўным спосабам лячэння ад алкагалізму і наркаманіі яна назвала 28-дзённую стацыянарную рэабілітацыйную праграму, у аснове якой – “мінесоцкая мадэль” (12-крокавая праграма). Яна ўяўляе сабой працу ў групах і аб’ядноўвае вопыт спецыялістаў і залежных людзей, у якіх вялікі тэрмін цвярозасці. Часцей за ўсё гэта групы ананімных алкаголікаў і наркаманаў. Іх члены разважаюць над тым, што іх хвалюе, дзеляцца сваімі думкамі і пачуццямі, вучацца аналізаваць свае дасягненні і няўдачы, прымаць падзяку і крытыку, вырашаць канфлікты і шмат іншага. Лячэнне пацыентаў па 28-дзённай рэабілітацыйнай праграме па накіраванні мясцовага ўрача-нарколага здзяйсняецца бясплатна, калі залежны чалавек хоча захаваць сваю ананімнасць, яму прыйдзецца заплаціць больш за 600 рублёў. У Гродзенскім клінічным цэнтры праз гэтую праграму пралечаны болей за 1 500 чалавек.
– Вылечыць залежнага чалавека мы не можам, дапамагчы дасягнуць цвярозасці – так. Але гэтую цвярозасць ён павінен падтрымліваць усё сваё жыццё, – акцэнтавала ўвагу прысутных урач-нарколаг Валянціна Міхайлаўна. – Дзе ён гэта можа рабіць? На жаль, ні ў сям’і, як многія мяркуюць. Для гэтага існуюць групы ўзаемадапамогі “АА”.
Ананімныя алкаголікі і наркаманы з Гродна і Свіслачы падзяліліся з аудыторыяй сваім вопытам, як яны пераадолелі сябе і сталі на шлях выздараўлення.
Для жадаючых, якія хочуць змяніць сваё жыццё, былі пакінуты нумары тэлефонаў і адрасы, куды можна звярнуцца за дапамогай. Нумар Гродзенскага клінічнага цэнтра “Псіхіятрыя і наркалогія” – (80152) 75-74-62, адрас групы “АА” ў Свіслачы – вул. Гагарына, 14/1. З дзейнасцю таварыства цвярозасці “Пакроўскае”, якое было ўтворана пры Свята-Пакроўскім саборы 6 гадоў таму, пазнаёміў госць з Гродна Мікалай Байда.
У Свіслацкую раённую бібліятэку іерэй Павел перадаў дыск і кнігі па прафілактыцы і лячэнню залежнасцей у чалавека. Ён прапанаваў арганізаваць з падоранай літаратуры асобны раздзел для чытачоў – “Духоўная кніга – крыніца мудрасці”.
Таксама ў практычным семінары прыняла ўдзел медыятар Аксана Шульга з Гродзенскага філіяла навучальна-практычнай установы “Цэнтр “Медыяцыя і права”. Яна прапанавала сваю бясплатную дапамогу ў рамках праекта, які стартаваў у раёне пры аддзеле ЗАГС.
Алена КЕДЗІК.