З ранняга дзяцінства памятаю, як пад настрой мой татка, Мікалай Мікалаевіч Пракопік, чытаў прыгожыя вершы:
Па-над белым пухам вішняў,
Быццам сіні аганёк,
Б’ецца, ўецца шпаркі, лёгкі
Сінякрылы матылёк…
Альбо адчыніць дзверы ў хату марозным вечарам і звонка паддасць усім настрою:
Здароў, марозны звонкі вечар!
Здароў, скрыпучы, мяккі снег…
Ці ў хмурую веснавую раніцу:
Праясняецца пагода,
Бо вярнулася вясна.
Так я з малых гадоў убірала ў сябе любоў да паэтычнага слова, да кнігі. Сапраўднай асалодай былі паходы ў бібліятэку ў Глушкі, гэта больш за кіламетр ад нашай вёскі. Здаецца, я і зараз адчуваю непаўторны пах кнігі…
Толькі ў школе даведалася, што цудоўныя татавы вершы напісаў Максім Багдановіч. Яго паэзія мяне натхняла, вучыла любіць свой край, расці патрыёткай. Пад яго ўплывам сама стала трошкі пісаць, многа чытала і марыла быць паэтам ці журналістам.
Час ляціць хутка. Але што ў сэрца, у душу закладзена з дзяцінства – не забываецца. І зараз кніга вершаў Максіма Багдановіча «Краю мой родны» ў мяне на рабочым стале. Я бяру яе з сабой у вандроўкі і перачытваю, перачытваю, перачытваю... Часта звяртаюся да паэтычных радкоў сапраўднага сына сваёй Радзімы пры падрыхтоўцы і правядзенні розных клубных мерапрыемстваў. Ён вельмі хацеў, каб беларуская мова гучала сярод іншых моў на адным узроўні, і ўсё сваё жыццё прысвяціў гэтай справе. На пачатку бягучага года я з задавальненнем паехала ў Мінск, каб пабываць у доме-музеі любімага паэта. Сустрэла там такіх жа апантаных людзей і з асалодай няспешна прайшлася па залах. А днямі наведала дом-музей Максіма Багдановіча ў Гродне. І зноў акунулася ў атмасферу яркага жыцця паэта.
Падрастае ўнучка Настачка. Вельмі любіць спяваць беларускія народныя песні, чытаць вершы. Я вучу яе беларускай мове, нашым цудоўным трапным выразам, паэтычнаму слову і веру, што паэзія майго любага паэта Максіма Багдановіча таксама знойдзе месца ў яе жыцці. Спадзяюся, што сваё жаданне трапіць у Ялту на магілу паэта мы здзейснім разам з ёй, з маёй унучкай. Каб пакланіцца Багдановічу…
Марыя САМАЛЕВІЧ,
аг. Грынкі.