banner

Чатыры ідэі для Беларусі

13 Декабря’18
2166
100.jpgУ Скідзелі прайшоў занальны этап рэспубліканскага конкурсу «100 ідэй для Беларусі». Пра якія праекты заявілі там рабяты з нашага раёна і хто атрымаў пуцёўку ў вобласць, мы даведаліся ў райкаме ГА «Беларускі рэспубліканскі саюз моладзі».

На суд экспертнага журы, расказала першы сакратар РК ГА БРСМ Марына Рудоміна, Свіслаччына прадставіла чатыры праекты.

Зацікавілі судзейства Гражына Іванюк (Дабравольскі ДС СШ) і Павел Лысевіч (Корнадзьскі ДС БШ), якія разам працуюць над міжшкольным праектам «Музей «Страчаная спадчына свіслацкага краю». Прысвечаны ён тым паселішчам, якіх ужо няма на карце раёна: хутарам, сядзібам, засценкам, фальваркам, урочышчам, вёскам, што налічваюць усяго некалькі двароў.

За плячамі вялікая работа: сабраны і сістэматызаваны матэрыял, створана электронная ментальная карта «Карані малой радзімы», зроблены і макет музея пад адкрытым небам, стварэнне якога павінна стаць галоўным вынікам даследчай работы навучэнцаў. Ёсць прапанова размясціць яго на тэрыторыі ранейшага хутара Войтаў Мост. Мэта самая высакародная – увекавечыць мясцовыя айконімы, захаваць памяць пра іх для будучых пакаленняў. Таму і не дзіўна, што аўтары праекта запрошаны на абласны этап, які пройдзе ў Гродне ў студзені.

Не менш цікавымі былі і два праекты, прадстаўленыя СШ № 2 імя М. П. Масонава г. Свіслачы. Так, вучань 9 класа Віталій Кавальчук выступіў з праектам «Вандроўнічаем 0+», мэта якога распрацаваць інтэрактыўную карту Свіслацкага раёна з улікам месцаў для камфортнага падарожжа бацькоў з дзецьмі. А Паліна Несцяровіч і Аляксей Гінэль з гэтай жа ўстановы адукацыі прывезлі на конкурс ідэю распрацоўкі краязнаўчых інтэрнэт-праектаў, турыстычных маршрутаў для арганізацыі і правядзення экскурсій па родным краі. «Я запрашаю вас на малую радзіму» – такую назву мае іх праект. Журы параіла канкурсантам з СШ № 2 аб’яднаць свае працы і паспрабаваць сілы на абласным этапе.

Уважліва выслухалі суддзі і аўтараў ідэі «Асфальт, які гаворыць» – Ульяну Валюк, Вікторыю Патоцкую і Дар’ю Шкодзіч, вучаніц 10 класа Ханявіцкага ДС СШ. Дзяўчаты падзяліліся думкай маляваць, скажам, на сцежках у парку, класікі і твітэр, каб дзецям было чым заняцца ў вольны час, а таксама пакідаць на асфальце каляровыя прызывы да чысціні, выканання Правіл дарожнага руху і г.д. Спробы ўжо былі, і людзі звярталі ўвагу на творчасць школьнікаў, з задавальненнем чыталі надпісы.
Усім канкурсантам былі ўручаны сертыфікаты ўдзельнікаў і памятныя сувеніры. Спецыяльным падарункам ад абкама ГА БРСМ адзначаны праект «Музей «Страчаная спадчына свіслацкага краю», які, як ужо гаварылася вышэй, працягне спаборніцтва на абласным этапе.

Наталля ТУРКО.

Предыдущая статья

Значимость семьи нельзя переоценить