Цёплае дажджлівае надвор'е чакаецца ў Беларусі на гэтым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Жнівень толькі пачаўся, але ўжо азнаменаваўся выхадам актыўнага паўднёвага цыклону, які прынёс у заходнія вобласці Беларусі інтэнсіўныя дажджы. Сёння на працягу дня цэнтр цыклону будзе ісці праз паўночны захад нашай краіны на Пскоўскую вобласць Расіі, таму на большай частцы тэрыторыі пройдуць дажджы, месцамі з навальніцамі, па паўночным захадзе ў асобных раёнах чакаюцца моцныя дажджы. У многіх раёнах рэспублікі прагназуецца ўзмацненне ветру парывамі да 15-20 м/с", - расказалі ў Белгідрамеце.
У бліжэйшыя суткі франтальныя раздзелы пакінуць тэрыторыю Беларусі і ўмовы надвор'я будзе вызначаць халаднаватая няўстойлівая паветраная маса.
У аўторак, 3 жніўня, месцамі па рэспубліцы чакаюцца кароткачасовыя дажджы, навальніцы. Вецер прагназуецца заходні парывісты, уначы месцамі ў паўночных раёнах моцны парывісты. Тэмпература паветра ўначы складзе плюс 9-15. Удзень будзе ад плюс 20 па поўначы да 26 градусаў цяпла па поўдні краіны.
У сераду, 4 жніўня, уначы будзе пераважна без ападкаў, раніцай і ўдзень месцамі пройдуць кароткачасовыя дажджы, прагрымяць навальніцы. Вецер чакаецца няўстойлівы слабы да ўмеранага, пры навальніцах парывісты. Тэмпература паветра ўначы складзе плюс 8-13. Удзень паветра прагрэецца ад 20 да 27 градусаў.
У чацвер, 5 жніўня, месцамі па рэспубліцы пройдуць кароткачасовыя дажджы, прагрымяць навальніцы. Вецер прагназуецца няўстойлівы слабы да ўмеранага, пры навальніцах парывісты. Тэмпература паветра ўначы складзе плюс 11-17. Удзень будзе 20-27 градусаў цяпла.
У пятніцу, 6 жніўня, праз тэрыторыю Беларусі будзе перамяшчацца чарговая сістэма актыўных атмасферных франтоў. На большай частцы тэрыторыі краіны пройдуць кароткачасовыя дажджы. У асобных раёнах прагназуюцца моцныя дажджы, месцамі навальніцы. Тэмпература паветра ўначы складзе ад плюс 10 па поўначы да 18 градусаў цяпла па паўднёвым усходзе краіны. Удзень будзе плюс 18-25, па паўднёвым усходзе плюс 26-28 градусаў.
Паводле прагнозаў сіноптыкаў, у выхадныя захаваецца няўстойлівае ўмерана цёплае надвор'е.
У цэлым тэмпература ў першую дэкаду жніўня прагназуецца на 1-2 градусы вышэйшай за кліматычную норму.
