banner

Аб’яднанне для сям’і

05 Июня’13
1570
Аб’яднанне для сям’іУ Міжнародны дзень сям’і, які адзначаецца кожны год 15 мая, дзверы Нязбодзіцкай біблія-тэкі – цэнтра краязнаўства былі адчынены для ўдзельнікаў аматарскага аб’яднання сямейнага накірунку "У кругу сям’і”, які дзейнічае пры бібліятэцы з 2006 года. Усе ўдзельнікі аб’яднання з’яўляюцца чытачамі бібліятэкі. Аб’яднанне мае свой статут, дзе вызначаны мэта і задачы, правы і абавязкі членаў, мае дэвіз і эмблему. "Калі хочаш быць шчаслівым – будзь ім” – такі дэвіз сямейнага аб’яднання. Эмблема – падкова, сімвал сямейнага шчасця. Паўсюдна сярод усходніх славян існуе вера ў незвычайныя ўласцівасці конскай падковы. Па павер’ях нашых продкаў, падкова сімвалізавала шчасце і поспех, уяўляючы сабою магутны абярэг ад дрэннага вока і нячыстай сілы. Абавязковая ўмова – падкову трэба знайсці на дарозе. Такое прыхільнае стаўленне да падковы магло быць выклікана тым, што яе форма нагадвае арку. У кожнай хаце ў чырвоным куце быў ручнік, які пакрываў абраз – ён нагадваў сабою арку.
Асноўная мэта аб’яднання – далучэнне да беларускай нацыянальнай культуры, выхаванне працавітасці, клапатлівасці, добразычлівасці, фарміраванне культурных адносін дзяцей з сябрамі, бацькамі, старэйшымі і малодшымі членамі сям’і. Для ўдзельнікаў аб’яднання складаюцца цікавыя праграмы, тэмы многіх мерапрыемстваў падказвае само жыццё. Гэта фальклорныя вячоркі, духоўна-інфармацыйныя гадзіны, сямейныя вечары да народных святаў: Калядкі, Пасха, Купалле, восеньскія Дзяды, тэматычныя, музычна-паэтычныя вечарыны, гульнёва-пазнавальныя гадзіны, святы адпачынку. Пры правядзенні мерапрыемстваў рыхтуюцца кніжныя паліцы: "У свеце захаплення сям’і”, "Гаспадарчаму воку”, "Бацькам аб дзецях”, "Сцежкамі здароўя”.
Мерапрыемства да Дня сям’і пад назвай "Сям’я – тварэння вянец” пачалося з выставы сямейных фотаздымкаў, на якой былі прадстаўлены вясельныя фота сямей удзельнікаў аб’яднання і, як вынік моцнай, шчаслівай сям’і, – здымкі дзяцей разам з бацькамі, бабулямі і дзядулямі. А потым усіх запрасілі да ўдзелу ў конкурсах і гульнях. Для дзяцей і іх бацькоў прайшла камандная гульня "Хто хутчэй”. Дарослыя не ўступалі ў хуткасці па бегу ў галёшах на мятле вакол крэсла. Захапіла гульня "Снайпер”. Пераможцам стаў той, хто за адну хвіліну ў малочную бутэльку закінуў больш гарошын. Усе з цікавасцю адгадвалі загадкі, дапаўнялі працяг прыказак і прымавак пра сям’ю і беражлівасць. Самым маленькім удзельнікам спадабалася прыгатаваная для іх гульня-сюрпрыз. Атрыманыя мяккія цацкі дабавілі ім настрою. За агульным салодкім сталом, які сабраў усіх разам, дарослыя дзяліліся сваімі сакрэтамі сямейнага шчасця.
Галіна ГРУШЭЎСКАЯ,
бібліятэкар Нязбодзіцкай бібліятэкі – цэнтра краязнаўства.
На здымку: на выставе сямейных фотаздымкаў.

Предыдущая статья

Благодарность за воспитание сына-милиционера