banner

На Купалу ў ночку цёмну

09 Июля’14
1433
На Купалу  ў ночку цёмнуЗ вясёлай музыкай, жвавымі танцамі, купальскімі песнямі і народнымі абрадамі свіслачане адзначылі свята Купалле, якое па традыцыі ладзіцца ля вадаёма ў гарадскім парку. Жадаючых адшукаць папараць-кветку, якая згодна з легендай расцвітае ў купальскую ноч, павадзіць карагоды вакол вогнішча, запусціць на ваду вянкі знайшлося нямала. І гэта нягледзячы на тое, што перыядычна пакрапваў дождж.
 Акунуцца ў далёкае мінулае, адчуць дух магічнай сілы і чараўніцтва купальскай ночы дапамаглі ўдзельнікам свята работнікі культуры. Яны паклапаціліся аб тым, каб кожны, хто прыйшоў на Купалле, адчуў прыўзняты настрой. Жаночая вакальная група "Мілавіца”, народны хор  "Сузор’е” і народны фальклорны калектыў "Крынічанька” раённага Дома культуры дарылі свіслачанам народныя песні. Не абыйшлося і без галоўных герояў Купаліша і Купалінкі. Яны прывіталі ўсіх, пажадалі шчасця, здароўя і дабрабыту. Як дар матухны-зямлі, Купаліш з Купалінкай перадалі хлебнае калоссе старшыні раённага Савета дэпутатаў В. А. Суботку з пажаданнем, каб новы ўраджай свіслацкія хлебаробы сабралі без страт і памножылі хлебнае багацце нашай краіны.
Завітаў на народнае гулянне і чорт, які імкнуўся ўсталяваць свае парадкі. Але як ні стараўся, сапсаваць настрой свіслачанам сваімі нячыстымі справамі яму не ўдалося: дабро перамагло зло. А самыя актыўныя ўдзельнікі конкурсаў, якія дапамагалі прагнаць нячысціка, атрымалі заахвочвальныя прызы. 
На Купалу  ў ночку цёмнуПерш чым дзяўчаты спусцілі на ваду вяночкі, а купальскае вогнішча набрала моц і сілу, пажарныя-ратаўнікі Свіслацкага раённага аддзела па надзвычайных сітуацыях прадэманстравалі водную феерыю. Паводле паданняў, у гэты дзень праходзіла ачышчэнне агнём і вадой, якія ў купальскую ноч валодалі вялікай магічнай сілай. Пасля прыняцця хрысціянства паганскія вераванні цесна перапляліся з хрысціянскімі. На Івану Купалу сталі пачытаць Іаана Хрысціцеля. Лічылася, што менавіта ў дзень летняга сонцастаяння і нарадзіўся Хрысціцель. 
Падчас свята свіслачане змаглі наведаць гандлёвыя кропкі, а дзеці пазабаўляцца на атракцыёнах. Дарэчы, у гэтым годзе самымі кемлівымі і смелымі былі дзеці, менавіта яны адшукалі чароўную папараць-кветку. 
Алена КЕДЗІК, 
Вольга БОТВІЧ (фота)

Предыдущая статья

В подарок – детская площадка