Улюбёныя ў Хрысце браты і сёстры!
Набліжаецца тое імгненне, калі на аксаміце вечаровага неба з’явіцца першая зорачка і прынясе шчаслівую вестку аб тым, што нарадзіўся Збавіцель. У прадчуванні гэтай жаданай хвіліны мы павінны ў каторы раз пераасэнсаваць сваё жыццё, пераадолець у сабе ганарлівасць і хцівасць, злосць і зайздрасць, якія так перашкаджаюць нам быць вартымі ласкі Божай. Іначай у нас няма права наблізіцца да яселькаў, дзе знаходзіцца маленькі Езус. Толькі вялікая вера, дабрыня, бескарыслівасць, шчырасць і любоў да бліжняга здолеюць сагрэць Яго ў гэты зімовы вечар.
І таму, сабраўшыся за сталом на Вігілійную вячэру і дзелячыся аплаткаю, давайце забудзем учарашнія крыўды, шчыра даруем усім, хто нас абразіў, папросім прабачэння ў маці з бацькам, у мужа ці жонкі, у брата ці сястры, у дзяцей, жадаючы адзін аднаму шчасця і дабрабыту, радасці і цяпла.
Часам для гэтага патрэбны вялікая духоўная праца над сабой, пераадоленне сябелюбства і пагарды, але толькі пазбавіўшыся такога цяжару можна паяднацца з Богам і адчуць спакой у сэрцы. Нованароджаны Езус ёсць сімвал нашага духоўнага адраджэння, перамогі дабра над злом, наша надзея на выратаванне.
Шчасця і спагады ўсім, хто імкнецца да паяднання з Сынам Божым, дабрыні і міласэрнасці тым, хто яшчэ не знайшоў дарогі да Хрыста. Няхай далёкае святло Віфлеемскай зоркі заззяе ў кожнай душы, ачысціць яе ад скрухі і сумнення, няхай прынясе надзею і спакой. Няхай Дзіця Божае агорне нашы сем’і цяплынёй і радасцю, няхай удыхне ў кожнага новае жыццё, няхай укажа праўдзівую дарогу жыцця.
Свае шчырыя віншаванні мы таксама дасылаем і братам праваслаўным. Няхай Божае благаславенне дапаможа вам сустрэць святы ў радасці і спакоі.
Няхай радасцю і Божым святлом напоўніцца кожны ваш дзень. Няхай ніколі не пакіне нас надзея і вера.
Касцёл Рымска-Каталіцкі св. Францішка з Асыжу ў Свіслачы і яго вернікі для ўсіх прыхільнікаў каталіцкай канфесіі на Свіслаччыне.
