Адно з самых вясёлых і захапляючых свят — “Масленіцу” — адзначылі свіслачане і госці горада ў нядзелю. На народнае гулянне гукаць вясну сабраліся і дзетвара, і дарослыя, і людзі сталага ўзросту. А як жа інакш?! Забаў і гульняў хапала на ўсіх — выбар рабіў кожны на свой густ.
Надвор’е ў гэты дзень выдалася снежным — зіма быццам на развітанне вымятала апошнія снегавыя запасы, не збіраючыся ўступаць дарогу вясне. Тут і дарэчы тэатралізаванае прадстаўленне — сустрэча Зімы з Вясною, — падрыхтаванае работнікамі РДК. Ствараючы святочны настрой, свае цудоўныя прыпеўкі і песні дарылі свіслачанам самадзейныя артысты: народны фальклорны калектыў “Крынічанька”, народны хор ветэранаў працы “Сузор'е”, жаночая вакальная група “Мілавіца”, народны ансамбль народнай музыкі і песні “Пушчанскія напевы”. Не абышлося народнае гулянне без традыцыйных абрадаў — спальвання чучала і першага вясенняга карагода.
Самыя актыўныя і спартыўныя памераліся сіламі і павесялілі акружаючых, удзельнічаючы ў конкурсах лесарубаў, сямейных каманд, спартыўных спаборніцтвах, займальных праграмах. А вось “Свіслацкі стоўб” адолеў толькі Д. Б. Ладашчук. Роўных яму ў гэтым годзе не знайшлося. Упершыню быў арганізаваны конкурс “Ва ўладзе лёду і снегу”, у якім сваю фантазію праявілі вучні школ райцэнтра і выхаванцы Дома пазашкольнай работы. Пераможцам конкурсаў былі ўручаны заахвочвальныя прызы.
Жадаючыя з задавальненнем адведалі гарачых духмяных бліноў, якія на гэтым свяце сімвалізуюць сонца. Здаўна лічылася: хто адведае масленічны блін, будзе здаровым і вясёлым круглы год. Даспадобы свіслачанам прыйшліся і іншыя прысмакі.
Адгуляла “Масленіца” у Свіслачы. Стрэлася Зіма з Вясною. Але, відаць, прыйдзецца пачакаць вясновага надвор’я, бо пакуль назіраецца нейкі збой у зімова-вясновым пагадненні.
Алена КЕДЗІК.
Фота Грыгорыя ШЫРАЕВА.
