Сёння праваслаўныя вернікі адзначюць вялікае свята – Хрышчэнне Гасподняе ці Вадохрышча. У гэтыя дні святочныя богаслужэнні ў храмах суправаджаюцца асвячэннем вады.
На працягу многіх гадоў свіслачане падтрымліваюць традыцыю акунання ў сцюдзёнай купелі, якая загадзя асвячаецца свяшчэннаслужыцелямі. Вось і сёння праваслаўныя вернікі на чале з настаяцелем храма Узвіжання Крыжа Гасподняга г. Свіслачы іерэем Сергіем і айцом Дзіянісіям пасля святочнага богаслужэння хрэсным ходам накіраваліся да гарадскога возера, дзе пасля водасвятнага малебена самыя смелыя акунуліся ў купель. Такіх знайшлося нямала. Сярод іх добра знаёмыя свіслачане, якія штогод прыходзяць да купелі, каб акунуцца ў святую ваду і адчуць чысціню і лёгкасць. Заўсёды гэтую добрую традыцыю падтрымліваюць ратавальнікі-пажарныя і ветэраны службы МНС, бадай, і сёлета яны аказаліся самымі актыўнымі. Дарэчы, прадстаўніц прыгожай паловы не назіралася.
Тут на месцы былі і спецыяльныя ёмістасці са святой вадой, жадаючыя падыходзілі да іх і па чарзе напаўнялі прынесены з сабою посуд.Здаўна вядома, што вадохрышчанская вада ці агіясма (так яе называюць па-царкоўнаму) валодае гаючай сілай і прызначаецца для тых, хто па розных прычынах пазбаўлены Прычасця.Лiчыцца, што ў гэты дзень вада асвячаецца не толькi ў храмах, але i рэках, крынiцах і калодзежах. Вадохрышчанская вада доўга захоўваецца і не псуецца.
Генадзій Вакуеў:
– Я з ліку першых, хто калісьці падтрымаў прапанаваную традыцыю. Пасля святой вады адчуваю сябе, як нованароджаны. Я і дома загартоўваю арганізм, але тут ў такое вялікае свята ўсё па-іншаму: атмасфера, знаёмыя. Нават эмоцыі складана перадаць.
Такое масавае Вадохрышча, у якім прынялі ўдзел сотні прыхаджан, на Свіслаччыне было арганізавана ўпершыню. Аб яго правядзенні і забеспячэнні бяспекі на вадаёме паклапаціліся ратавальнікі-пажарныя, праваахоўныя органы, работнікі Свіслацкага РУП ЖКГ і прадстаўнікі раённай арганізацыі АСВОД.
Іван Кладкевіч:
– Пасля акунання ў купель складваецца ўражанне, быццам на нябёсах пабываў. На Вадохрышча прыходжу заўсёды, абавязкова набіраю святой вады і, канешне ж, падтрымліваю традыцыю свіслацкіх “маржоў”.
Алена КЕДЗІК.
Фота і відэа аўтара.
